Im 2025 startet d Münchesteiner Schuelfasnacht mit ere neue Route und viele Neuerige. Das git immer Unsicherheite und Froge, aber syt hüt am Morge schloht d Stimmig definitiv um: ab jetzt gilt d Vorfreud.
Mr sammle ys alli zämme uf em Schuelhuusplatz vom Loog Schuelhuus und alli warte gspannt. Wie mr das abgmacht hän gseht me vor allem viel Schwarz-Wyss und Zebras. Es isch s erste Mol, dass mr sone gmeinsam Sujet hän und es isch lessig zum gseh, wie unterschiedlig d Klasse das umgestzt hän bim baschtle. Es steggt viel Arbet drhinter. Und d’Hauptsach isch, dass es am Schluss mit eme Lächle drait wird. Au das Joor wärde mr begleitet von ere Guggemusigg wo sich extra für unseri KPTF Fasnacht zämme gwürflet het. D’ Freud stygt mit de erste Styggli als Platzkonzärt und denn gohts scho bald los uf d’ Route. Die fiehrt ys durch s Quartier und em Bahndamm entlang zum KUSPO. Uf em Wäg gniesse mr die viele Lyt am Strooserand wo nadyrlig unseri Dääfeli und Räppli abbikömme. Mit dr Musig vorus nöchere mr ys em KUSPO wo mr e glaini Stärkig zue ys nämme. Es git Weggli und Schoggistängeli zur Fier vom Daag. Gstärkt göhn mr denn nomol uuse, wo mr vo der Gugge nomol drey Styggli dörfe loose. Jetzt isch au wieder Zyt zum tanze und alli schwelge nonemol in de Fasnachtstön. Härzlige Dangg an alli wo fyr uns musiziert händ, es isch ys wie allewyl e grossi Freud gsi.